ທະຫານໄທສະກັດຈັບຍິງ ລາວ-ໄທ 5 ຄົນ ລັກລອບຂ້າມແດນຈາກມຽນມາ ຍ້ອນຖືກຕັດໄຟຟ້າ-ອິນເຕີເນັດ
ເມື່ອວັນທີ 18 ກຸມພາ 2025 ເຈົ້າໜ້າທີ່ທະຫານໜ່ວນສະເພາະກິດຈັງຫວັດຕາກ ໄດ້ອອກລາດຕະເວນບໍລິເວນ ບ້ານເງົາໄຜ່ ໝູ່ 11 ຕຳບົນຊ່ອງແຄບ ອຳເພີພົບພະ ເພື່ອປ້ອງກັນການລັກລອບເຂົ້າເມືອງຜິດກົດໝາຍ ຕາມນະໂຍບາຍຂອງລັດຖະບານໄທ ທີ່ສຸມໃສ່ການກຳຈັດແກັງ Call Center ແລະຂະບວນການຄ້າມະນຸດ.
ລະຫວ່າງການລາດຕະເວນ ເຈົ້າໜ້າທີ່ພົບບຸກຄົນຖືກສົງໄສ ເປັນຜູ້ຍິງຈຳນວນ 5 ຄົນ ລັກລອບເຂົ້າໄທຜ່ານຊ່ອງທາງທຳມະຊາດ ບໍລິເວນທ່າເງົາໄຜ່ ປະກອບດ້ວຍ:
– ນາງ ແຟນ ອາຍຸ 20 ປີ (ສັນຊາດລາວ)
– ນາງ ຕະວັນ ອາຍຸ 20 ປີ (ສັນຊາດລາວ)
– ນາງ ມາລິນາ ອາຍຸ 27 ປີ (ສັນຊາດລາວ)
– ນາງ ອາພາສິນີ ອາຍຸ 22 ປີ (ສັນຊາດໄທ)
– ນາງ ມໍລະກົດ ອາຍຸ 25 ປີ (ສັນຊາດໄທ)
ຈາກການສອບສວນ ຍິງທັງ 5 ຄົນໃຫ້ການວ່າ ສະໝັກໃຈຂ້າມແດນໄປທຳງານ ໃນພື້ນທີ່ເສດຖະກິດພິເສດຈີນໄຫ່ສາງ ຝັ່ງກົງຂ້າມກັບ ບ້ານຊ່ອງຂ້າມ ໝູ່ 1 ຕຳບົນຊ່ອງແຄບ ອຳເພີພົບພະ. ໂດຍເຮັດວຽກໃນຮ້ານເຮັດເລັບ, ຮ້ານອາຫານ ແລະ KTV.
ແນວໃດກໍຕາມ ພວກເຂົາຕັດສິນໃຈລັກລອບກັບມາ ເນື່ອງຈາກມາດຕະການຂອງທາງການໄທ ທີ່ຕັດໄຟຟ້າ ແລະ ອິນເຕີເນັດ ສົ່ງຜົນໃຫ້ການດຳລົງຊີວິດເປັນໄປໄດ້ຢ່າງຍາກລຳບາກ.
ເບື້ອງຕົ້ນ ເຈົ້າໜ້າທີ່ໄດ້ຄວບຄຸມຕົວຍິງທັງ 5 ຄົນ ໃຫ້ທາງເຈົ້າໜ້າທີ່ທີ່ກ່ຽວຂ້ອງດຳເນີນຄະດີຕໍ່ໄປ.
ທີ່ມາ: Matichon
